Laimi Nih Kan Uar Ngaimi KHAINI/RAJA

Khaini/Raja hi, khuhsi (tobacco) in an sermi asi. India ram company nih an sermi a si phun tampi a um. An ser tikah, Kala ca in an tial caah, a chung ah zei bantuk sivai (chemical) dah aa tel timi kan thei kho loh. A cheu cu dur in a um i, a cheu cu plastic bawmte ah an fun. Khaini/Raja hi a mak ve nak cu, a rim a chia ngai nain a hmawm mi nihcun an duh taktak i, a hmawm cangmi caahcun i sum a har ngaingaimi thil pakhat asi.

A cheu khaini/Raja dur/fun mi ahcun Mirang ca in tlawmte an tial. Cu Mirang ca in an tialmi ah biapibik in ruah dingmi thil pahnih a um:

1. Dot not sale for a minor (Kum tling lo cu zorh khawh asi lo)
2. Sale only for India (India ram chung lawng ah zuar ding)

C

u ca nih a langhtermi cu tobacco (khuahsi) in sermi thilri asi caah kum tlinglo caah tih a nung tinak alanghter. Cun hi thil hi ramdang ah zuar lo ding asi timi kan hmuh khawh. Cucaah kum tling lo nih tongh tik ah le USA ti bantuk hna ramdang i zuar ahcun, a silo ning in zuar (illegal) asi tinak asi.

Zeiruangah dah ramdang ah zuar ngam ding a si hngalo le India ram chung zuar ding lawng in an chuah hnga timi ruah tikah, minung ngandamnak caah tihnung asi caah asi.

Hi khaini nih minung taksa ah a tanglei damlonak hna hi a chuahpi khawh tiah research tuahtu hna nih an ti. Researth aphunphun an tuah hnu ah, khaini nih atanglei damlonak fak pipi a chuahpi tiah an ti.

1. Kaa cancer (kaa, lei, dang, hani cancer) a chuahter khawh
2. Hrawmhrawk cancer a chuahter khawh
3. Pawpi hmatnak le pawpi cancer a chuahter khawh
4. Cancer asilo zongah kaa le chungril damlonak a chuahpi khawh
5. Kum no tuk in a tongthammi cu nau-inn connak le cinnak a chuahpi khawh
6. Nulepa si huam lo nak a chuahpi khawh
7. Vunhawng a rocar ter khawh
8. Thluak chinchiah khawhnak a zawrter khawh
9. Mit khua hmuhnak a zawrter khawh
10. Hani hmatnak le haa fahnak a chuahter khawh
11. Minung thisen a ei khawh caah, minung a derter khawh
12. Cuap he aa pehtlaimi damlonak tampi a chuahpi khawh

Vawleicung ah minung an thihbiknak aruang tampi lak ah, khuhsi hman ruangah a thimi hi tamlei ah paruknak a si tiah an ti.

Cucaah khaini hmawmmi cu, an nun hnga ding kum tluk nung lo in an nunkhua a tawi deuh an ti. India bantuk minung an tam tuknak ram ahcun, khaini hi minung karh a fumtertu deuh khawh caah, khaini an sernak zong asi tiah atimi zong an um ve.

USA ah life insurance te hna cawk tikah, khaini hmawmmi cu an zawrh duh hna lo. A ruang cu tuan deuh ah an thi ko lai i, tangka kan sung tuk lai tiah an ruah caah asi.

Khaini le khuhsi in sermi thilri tambik a chuahnak ram pakhat asimi India ah, "kum khat chungah kaa cancer hma a ngei tharmi 80,000 lengmang an karh ti asi.