HNARTHI ( Epistaxis)

Hnarthi a chuahnak hi a ruang tampi a um. Zawtnak ruang i a chuah mi a si maw ti hi kan fianh hrim hrim awk a si.

Hnar ah hin thi hri tampi an um caah fawi te i kan hnar thi a chuah tawnnak a si. Hnarthi a chuahnak bik hi ‘Little’s area’ ti a si, A umnak hi kutdong i vawn sawhah a phak khawh. Hi ka hmun hi thihri pali- Anterior Ethmoidal artery, Septal branch of superior labial artery, Septal branch of superior sphenopalatine leh Greater palatine artery hna an i tawnnak hmun a si. Mah hi pali ai fonhmi hi a min ah Kesseilbach’s plexus tiah an ti. Hi ka zawnte hi kutdong zong i tawnghkhawhnak hmun a si ruangah kan i ralrin ngai a herh.

Hnarthi a chuahter tu hna:-

1.Hnarkua chung a thatlo ruangah;-
-Hma, keu, a peh peh i hahchiau.
-Sinus zawtnak, TB
-Hnarkua chung ah hnawm ai taap
-Thilnung luh. Eg. Cangvat, lit, Hngerhte.., etc.
-Hnarkua chung cancer

2.Zawtnak Dang Ruangah;
-Lung lei thatlonak
-Thi kai
-Thi cancer, Vitamin K / C chambau ruangah.
-Thin a thatlo ruangah
-Kal a thatlo ruangah
-Natchawknak tamtuk ei ruangah
-Cumpi, tangfah tbk

3. A ruang bik zong theihlo.

Zohkhenh ning:

1.First Aid-
A cunglei i ka vawn tialmi ‘Little’s area’ hi hnathi chuahnak bik a si ruangah
minute 5 hrawng na kut in na hmeh piak la. Vur i hnar nam piak zong a tha ngai ngai. Vur nih hin thihri pawl a sawnter i thi chuakmi a phih khawh.

2.Anterior Nasal packing ( Hnarkua phih)-

Hnarkua chungah ribbon gauge meter khat hrawng i a saumi le centimetre 2.5 tluk a saumi cu paraffin ah na ciah la, ral ring ten hnarkua chung ah rawn ding a si. SML 24 hnu lawngah chuah than ding. Hi bantuk i hnarthi chuakmi na tlop ah cun antibiotics hi pello ten ei chih ding a si. Mah hi sii nih hin, zawtnak dang sinus tbk a cang dingmi kha a ven khawh.

3.Posterior Nasal packing-

Hi bantuk a phan cangmi hi cu Thikai ruang i hnarthi a chuakmi a si caah
Sii-Inn ah nan kal hrim hrim la.

4. Hnarthi Chuah a hmangmi hna Caah i ralrin dingmi-

a) Hnarkua chung kheuh/sawh tbk hmanlo ding. (Nu leh pa hna nih kan fale cawnpiak ding).

b) Hnar ah bengh, thonghlo ding.

c) A rocartuk mi hmun hma le a khutuk mi hmunhma hnaah umkallo ding. Ni lin lakah vahlo ding.

d) Hnarthi a chuahah cun hnar hmehpiak ding. (hnarchung i thihri pawl kha phih ding)

e) Hnarthi chuak hi zawtnak a phun phun ruang i a chuahkhomi thil a si ruangah Hnarthi chuah a hmngmi hna nih Doctor te sin ah i zohter hrim hrim ding. –