Minung kan taksa le muisam dawhnak caah ttamhmawihnak phunphun kan hman hna. Asinain Muisam le taksa a dawhternak caah thingthei hna hi an biapi taktakmi an si ve. Na taksa le na sam dawhter na duh ahcun a tanglei thingthei hna hi ei khawh ahcun an tha tuk ko hnga.

Banhla: Banhla hi potassium tampi a ngeimi a si pinah vitamin A, C, le E a ngeimi a si i taksa le sam a thatet khun. Vitamin A nih hin kan taksa chungah a ummi kokkek chiti (natural oil) a thater peng. Vitamin E nih hin a rawkmi taksak/vunhawng a remh ti a si. Vitamin C nih hin vunhawng a kormi a rem ti a si.

Apple: Apple hi kum tampi chung muihmai siamremhnak caah hmanmi a si. Apple hang hrai khat hi takkholh kaa ah din lengmang khawh ahcun taksa a thianter i a nennoter. Kan lukheng ah apple hang i thukmi nih hin luval zong a kham ti a si. Cun shampoo in lu i thawl dih in apple hang in van tlengh thanmi nih khin sam a tleuter chinchin fawn.

Rungtawban: Rungtawban(Pineapple) nih hin taksa a tharchuah than lengmang i a thianter. Kan khup, kan kan keo, le kan kedi hi pinapple sa in hnurmi nih khin taksa a noter fawn ti a si.

Theithur: Theithur(Lemon) hi taksa le sam thianternak caah an hman ngaimi a si. Luval zong a khammi a si. Takkholhnak ti ah lemon darkeo keo hnih polhmi nih khin taksa a rim chiami khi a tawl i panh tein a kan umter ti a si. Hmepel zong a damter.

Sangphawthei: Sangphawthei(Papaya) hi hmai ah i thukmi nih hin a thi cangmi vunhawng a thater than ti a si. Asullam cu a cangmi, a kangmi vunhawng a remh tinak a si.